BETONG: Taun siti nyin kemari, RM4.2 miliun duit pampas tanah udah diberi ngagai mensia mayuh ba sekeda menua kandang pelilih Betong berindik ari projek ti ngerenchah tanah ka dipejalaika perintah.
Nya nyengkaum projek ngaga sereta ngemanahka jalai ba sekeda menua baka Jalai Nanga (Ng.) Linsum / Mara / Melanjan / Jelang / Luing/ Kerapa ke sepenyauh 8.1 kilometer (km), Jalai Mara / Selangking / Kerapa / Luing / Temedak sepenyauh 17.3 km enggau Jalai Luing / Gerugu / Penyuin / Ijok / Muman sepenyauh 7.2 km.
Pengawa nyuaka pampas ngagai 262 iku ari genturung pendiau ba kandang menua Betong udah diatur ba Rumah Lanyau Jembu @ Johnical, Ng Linsum, Layar, Betong, lemai ensanus.
Pengerami nya udah dipejadika Sapit Kepala Menteri ke lalu nyadi Menteri Betanam Betupi Moden sereta Menteri Pemansang Menua Pesisir, Sarawak, Datuk Patinggi Tan Sri Alfred Jabu Numpang.
Ku Jabu, pengawa ngerampas tanah rayat kebenar nadai kala nyadi baka ti sebut raban penyakal laban sida endang sengaja deka nyungkit sereta ngerembaika pekara nya ba menua pesisir.
Isu ngerampas tanah rayat sereta enda mayar sebarang pampas nadai kala nyadi ngelama tu, baka ti dikerembaika bala penyakal. Perintah nengah Inisiatif Baru Tanah Adat Bansa Asal (NCR) udah ngaku semua tanah ba kandang menua Ulu Layar, Betong nyadi tanah NCR. Proses nyukat tanah mega udah tembu dipejalaika, diatu semina nganti maya tanah nya ditetapka nyadi tanah Rezab Gunasama Bansa Asal ari baruh Seksyen 6 Atur Tanah Menua.
“Berengkah ari taun 2008 nyentukka sehari tu, penyampau duit pampas ke udah dibayar ba Bagi Menua Betong manggai ba RM15.3 miliun ke mungkur 2,107 iku penerima nengah 49 buah projek. Kati ku ngumbai nya ngerampas tanah rayat, pemansang ke digaga perintah ba menua pesisir nya pan ungkup rayat.
Nya alai, petenah ke ngumbai perintah ngerampas tanah rayat nya enda amat, laban mayur endar duit pampas udah dibayar perintah ngagai sida ke bekaul enggau pekara nya,” ku Jabu.
Ku iya, enti jalai alun nya udah tembu ila, mensia mayuh ari menua pesisir ke nyau sehari undur sereta mudik ari pasar Betong ngena perau ila ulih ngelimatka jam sereta mudah agi.
Iya bejaku munyi tu ba Pengerai Nyuaka Cek Pampas ngagai 262 iku penerima ditu, ensanus.
Berebak enggau pengerami nya mega, iya meransang rayat ba menua pesisir anang mudah kena kelakar raban penyakal ke semina nemu besemaya aja, ketegal deka nguntungka sida nyerumba pengawa bepilih ti deka datai tu ila.
Sama bisi ngulu pengerami nya Menteri Pengeraja Asal Enggau Rampa Menua Malaysia, Dato Sri Douglas Uggah Embas, Menteri Muda Pengintu Pengelantang Pendiau Mensia Mayuh Sarawak, Robert Lawson Chuat, Residen Betong, Datu Romie Sigan Daniel, pengari Penguasa Tanah enggau Survei Betong, Bakeri Samsudin, bala Ketuai Opis perintah, bala Ketuai Raban Bansa sereta urung 350 bala temuai ke bukai.
-http://www.utusansarawak.co.cc/2012/01/perintah-ukai-ngerampas-tang-mampas-ku.html
No comments: